Күдікті алдымен әлеуметтік желіде қант сататынын айтып, жарнаманы жан-жаққа таратқан. Байланысқа шыққан адамдармен жылы-жылы сөйлесіп, алдын-ала төлем жасауды сұрайды.
Осылайша, аз уақыттың ішінде халықтан 90 миллион теңге жинап алады. Бірақ бірде-бір тапсырыс орындалмады.
Қала тұрғындары алданып қалғандарын түсінгеннен кейін бірден полицияға арыз жазған. Нәтижесінде тәртіп сақшылары алаяқ әйелді ұстады. Қазір қылмыстық іс қозғалды.
«Аталған факті бойынша Қылмыстық кодексінің 190-бабы, 3-бөлігіне сәйкес сотқа дейінгі тергеу басталды. Бұл қызға қатысты келу міндеттемесі түрінде бұлтартпау шарасы қабылданды», – дейді облыстық полицияның ішкі және сыртқы коммуникациялар басқармасы басшысының міндетін атқарушы Татьяна Карпова.
Айта кетері, халықты алдап кеткен келіншек үш жылдан жеті жылға дейінгі мерзiмге бас бостандығын шектеу немесе сол мерзiмге бас бостандығынан айырылуы мүмкін. Мүлкі тәркіленеді.
