Жобаның басты мақсаты – ауыл жастарын бұқаралық спортқа тарту және талантты спортшыларды қолдау. Ашылу шарасына Қонаев, Алатау қалаларынан және Алматы облысының тоғыз ауданынан келген 11 команда қатысты.
Жобаның бастамашылары – Алматы облысының дене шынықтыру және спорт басқармасы мен облыстық спортты дамыту орталығы. Облыс әкімінің орынбасары Болат Күренбеков атап өткендей, бұл жоба екінші жыл қатарынан ұйымдастырылып келеді. Соның нәтижесінде 140 спорт клубы ашылып, 13,5 мыңнан астам тұрғын жүйелі түрде спортпен шұғылдануға мүмкіндік алған. Бұл көрсеткіш облыстағы спортқа тартылған халық үлесінің 39%-дан 41,4%-ға өсуіне әсер еткен.
Ашылу салтанатын каратэ мен футбол үйірмелерінің жас спортшылары өз өнерлерімен әрледі. Ал облыстық спорт басқармасы басшысының м.а. Рахман Шахарбектің айтуынша, жобаның аясында ауылдық жерлердегі 10 мыңнан астам жас қамтылған.
«Көпшілікке қолжетімділік – шеберлікке бастар жол» қағидатына сүйене отырып, біз спортты шалғай ауылдарға жеткізуді басты назарда ұстап отырмыз. Бұл жарыстар жастардың кәсіби клубтарға жол ашуына да сеп болады», – деді ол.
Бүгінде облыста 1880-нен астам спорт нысаны жұмыс істеп тұр. Былтыр ғана Еңбекшіқазақ пен Райымбек аудандарында жаңа спорт кешендері пайдалануға берілді.
Жоба аясында ауылдық округтерде футбол, волейбол, баскетбол және үстел теннисі секілді спорт түрлерінен әуесқой клубтар құрылды. Биылғы жарыс бағдарламасына үстел теннисі алғаш рет қосылды. Барлығы 140-тан астам клуб жұмыс істеп тұр.
«Алатау лига-2025» үш кезең бойынша өткізіледі: алғашқысы 15 сәуір мен 15 мамыр аралығында, екінші кезеңі – 20 тамыз бен 20 қыркүйек аралығында, ал ақтық сын 10-25 қазан күндері өтеді. Жеңімпаз командалар кубоктармен, медальдармен және құрмет грамоталарымен қатар, жалпы жүлде қоры 16 миллион теңгені құрайтын бағалы сыйлықтармен марапатталады.
Бұл – ауыл жастарының әлеуетін ашатын, олардың арманына жол ашатын маңызды бастама.
