«Лизинг» жобасы шалғай жатқан елді мекендердегі шаруашылықтардың әл-ауқатын жақсарту, мал тұқымын асылдандыру мақсатын көздейді.
«Жаңадан іске қосылған бағдарлама арқылы шаруалар 2,5 пайыздық несиемен 5 жыл мерзімге асыл тұқымды мал алуына болады. Облыс әкімдігінің қолдауымен алынған малдың 20 пайызы кепілдікте тұрады. Биыл 2000-нан астам асыл тұқымды ірі қара, 10000 бас қой тұқымын үлестіруді жоспарлап отырмыз. Қазіргі таңда 15 шаруа қожалығынан өтініш түсті», – деді облыстық ауыл шаруашылығы басқармасының бөлім басшысы Бауыржан Садықов.
Оның айтуынша, облыс әкімдігі шаруаларға мал үлестіру үшін Ақөзек ауылындағы «Dinara Group» агрохолдингінің филиалымен екіжақты келісімге қол қойды.
«Біздің холдинг 4 бағытта жұмыс жасайды. Оның ішінде, ангус және герефорд секілді ірі қараның етті екі түрін, сүтті галштейн сиырын, қойдың меринос, жылқыдан Мұғалжар тұқымдарын өсіреміз, ешкіміз де бар. Қаншама жылғы еңбегіміздің нәтижесінде 43000 бас мал жиналды. Асыл тұқымды мал өзіміздің облыста қалса деген ойымыз бар. Ақөзектен шыққан қой мен сиыр басқа аудандарға барып жерсініп, өсіп кетсе қуанамыз», – деді серіктестік басшысы Бақыт Атайбеков.
