Екіжақты кездесу барысында өңір басшысы Марат Сұлтанғазиев биылғы өткен шараның қазақстандықтар мен туристер үшін үлкен қызығушылық тудырғанын атап өтті.
«Ашық суда жүзуден спорт жарысының өтуі – шомылу маусымының басты оқиғасы болды. Қонаев қаласы екі күн бойы бағы мен бабын қатар сынаған спортшылардың ауқымды орталығына айналды», – деді облыс әкімі.
Өз кезегінде франшиза иесі Ералы Оралов келесі маусымда додаға 1800-ге жуық спортшы қатысатыны, олардың 4 санат бойынша бәсекелесетіні жайлы мәлімдеді.
«Біз қазақстандықтардың халықаралық деңгейдегі спорттық шараларға сұранысы өте жоғары екенін байқадық. Тіркеу аяқталғаннан кейін біздің алғашқы сайысымызға қатысуға ниет білдірушілердің біз ойлағаннан әлдеқайда көп екені анықталды», – деді Ералы Оралов.
Кездесу соңында «Oceanman Kazakhstan» сайысы 2023 жылдың 1-2 шілдесінде өтетіні айтылды.
Жарысқа қолдау білдірушілер:
• ҚР Мәдениет және спорт министрлігі
• «Kazakh Tourism» Ұлттық компаниясы
• Алматы облысы әкімдігі.
Бас серіктестер:
• «Самұрық-Қазына» ұлттық әл-ауқат қоры» АҚ
• «Sport Qory» туризм және спорт саласын қолдау қоры.
Ал жобаның бас демеушісі – «Freedom Holding Corp» инвестициялық тобы.
Айта кетейік, 2022 жылдың шілдесінде Қонаев қаласында «Oceanman Kazakhstan» жарысы өтті. Бұл додаға 7 елден 1200 қатысушы тіркелді.
