Ауқымды жоба Талғар ауданындағы жұмыс істеп тұрған «Ақбұлақ» спорт орталығының базасында жүзеге асырылуда. Өткен жылдың қыркүйек айында «Sport Asset Management» қоғамдық бірлестігі мен «Doscar Group» ЖШС испаниялық «Атлетико де Мадрид» футбол клубымен бірлескен қызмет туралы келісімге қол қойған болатын. Осы ынтымақтастық аясында Орталық Азияда алғашқы «Атлетико де Мадрид Қазақстан» футбол академиясын ашу жоспарланған.
Құрылыс үш кезеңмен жүргізіледі
Академияның құрылысы үш кезең бойынша жүзеге асырылады:
-
Бірінші кезең — балалар академиясының инфрақұрылымын салу. Бұл кезеңнің жұмыстары 2025 жылдың мамырында басталып, 2026 жылдың соңына дейін аяқталады деп күтілуде. Қазіргі уақытта қонақүй ғимараты қайта жаңартылып, бір футбол алаңының реконструкциясы қызу жүргізіліп жатыр. Алаңды 2025 жылдың 30 маусымында пайдалануға беру жоспарланған.
Сонымен қатар, келесі нысандар бойынша жобалық құжаттамалар келісілуде:
-
20 киім ауыстыратын бөлмесі, душ кабиналары, медициналық пункттері, жаттығу және конференц-залдары, көрермендерге арналған алаңдары бар әкімшілік-тұрмыстық кешен;
-
қысқы жаттығуға арналған жасанды жабыны бар жабық футбол залы;
-
жасанды төсемі бар екі ашық футбол алаңы;
-
қақпашыларға арналған арнайы жаттығу алаңы;
-
бұрынғы садақ ату ғимаратын заманауи өткізу пунктіне қайта бейімдеу (кіру аймағы, санитарлық тораптар, күту залы және кафетерий).
-
Екінші кезең — кәсіби футбол командаларына арналған инфрақұрылым салу. Бұл кезеңде табиғи шөп төселген екі ашық алаң, жасанды жабынды бір алаң және толық жабдықталған әкімшілік кешен тұрғызу жоспарланып отыр.
-
Үшінші кезең — 10 000 көрерменге арналған үлкен стадион салу көзделген.
Қазақстандық футболға жаңа серпін
Жоба аясында бой көтеретін академия тек заманауи спорттық база ғана емес, болашақта әлемдік деңгейдегі футболшыларды дайындайтын орталыққа айналуы күтілуде. Бұл өз кезегінде қазақстандық футболдың дамуына тың серпін береді.
Аталған жобаны Алматы облысы әкімдігі жан-жақты қолдап отыр. Инфрақұрылыммен қамтамасыз ету, қажетті рұқсат құжаттарын жеделдету және құрылыс барысын үйлестіру — өңір басшылығының тұрақты бақылауында.
