Соңғы жылдары бұл сала өңірдің негізгі дамушы бағытына айналып, азық-түлік қауіпсіздігін қамтамасыз етуге, халықты жұмыспен қамтуға және экспорттық әлеуетті арттыруға елеулі үлес қосып келеді. 2024 жылдың қорытындысы бойынша ауыл шаруашылығының жалпы өнім көлемі 679,2 млрд теңгені құрап, облыс экономикасының 7 пайызын иеленді.
Алматы облысының негізгі көрсеткіштері
Алматы облысы ауыл шаруашылығының бірнеше бағыты бойынша республикада жетекші орын алады:
-
1-орын: ет өндіру, өрік өсіру, құс шаруашылығы
-
2-орын: қант қызылшасы, қызанақ, қияр және орамжапырақ өсіру
-
3-орын: ұсақ мал басы бойынша
2024 жылы агроөнеркәсіп кешенінің экспорт көлемі 38,7%-ға өсіп, 391,4 млн АҚШ долларына жетті.
Сүтті мал шаруашылығын дамыту
Өңірде сүтті мал шаруашылығына ерекше көңіл бөлінуде. Республикалық бюджеттен бөлінген 15 млрд теңге есебінен 13 сүт-тауарлы ферма салу жобасы қолға алынған. Биылдың өзінде 11 ферма іске қосылып, 7 100 бас ірі қара мал қамтылатын болады. Бұл ауылдағы өндірістік әлеуетті арттырып, жаңа жұмыс орындарын ашуға мүмкіндік береді.
Ірі инвестициялық жобалар
-
«Кеген МясПром» ЖШС ет комбинаты іске қосылды. Кәсіпорын жылына 3 000 тонна ет, 330 тонна шұжық және 70 тонна консерві өндіреді. 50 тұрақты жұмыс орны құрылды.
-
Балқаш ауданында 200 бас ірі қара малға арналған бордақылау алаңы салынды. Еңбекшіқазақ ауданындағы алаң 1 500 басқа дейін кеңейтілді.
-
Талғар ауданында жылына 350 тонна көкөніс өндіретін жылыжай кешені жаңғыртылды.
Сонымен қатар:
-
PepsiCo Central Asia ЖШС жылына 21 мың тонна картоп өңдейтін зауыт салып жатыр. Бұл жоба 350 жаңа жұмыс орнын ашуға мүмкіндік береді.
-
Al Khaleej Sugar компаниясының қант зауыты жобасы жүзеге асырылуда. Жылына 5 млн тонна қант өңдеп, өнім Өзбекстан, Тәжікстан, Ауғанстан, Иран және басқа елдерге экспортталатын болады.
-
AGRIFARM CO., LTD және Human Capital компанияларының 290 млн АҚШ доллары көлеміндегі терең астық өңдеу агропаркі салынуда.
Су инфрақұрылымын дамыту
Облыста суармалы инфрақұрылымды дамыту бағытында кешенді жұмыстар жүргізілуде. Қазіргі уақытта Қонаев қаласы мен 8 ауданда 12 жоба іске асырылып жатыр. Су ресурстары және ирригация басқармасы мен «Алматыоблводхоз» мекемелері құрылған.
2024 жылы Мемлекет басшысының Ислам даму банкімен қол қойған 165,8 млн АҚШ доллары көлеміндегі келісім аясында Алматы облысына 260,3 млрд теңге бағытталды.
-
1-кезең: Балқаш, Еңбекшіқазақ және Ұйғыр аудандарында 825 км суару жүйесі жаңғыртылып, 57 мың гектар жер ауыл шаруашылығы айналымына енгізіледі.
-
2-кезең: 169 млрд теңгеге тағы 1 575 км суару жүйесі қалпына келтіріледі.
2022-2025 жылдар аралығында 1,1 млн гектар пайдаланылмай жатқан ауыл шаруашылығы жерлері анықталды. Оның ішінде 445,5 мың гектары мемлекеттік меншікке қайтарылды.
«Ауыл аманаты» бағдарламасы ауыл тұрғындарының әл-ауқатын арттыруға елеулі әсер етуде. Соңғы екі жылда 11 млрд теңгеге 1 360 микрокредит беріліп, ауыл тұрғындарының орташа табысы 254 мың теңгеден 312 мың теңгеге дейін өсті. Биыл қосымша 2,5 млрд теңгеге 270 микронесие беру жоспарланған.
Алматы облысында ауыл шаруашылығын дамыту мемлекеттік саясаттың басым бағыты болып қала береді. Ауыл шаруашылығы саласында жүргізіліп жатқан кешенді жобалар мен инвестициялар өңірдің тұрақты дамуына, халықтың табысын арттыруға және экономикалық дербестігін нығайтуға мүмкіндік беруде.
