Жиын барысында Саты ауылында болған қайғылы жағдайдан кейінгі мектеп оқушыларының хәл-жағдайы талқыланды. Сонымен қатар комиссия мүшелері облыс әкімінің бірінші орынбасарына бірқатар ұсыныс тастады.
Нақтырақ айтқанда, аудан әкімінің міндетін атқарушы Кеңес Қабылбековтің айтуынша, төбелес нәтижесінде қайтыс болған Мирасты соққыға жыққан Алишер Бақыт қазіргі таңда үй қамақта отыр. Оған психологтар күнде барып, көңіл-күйінің өзгеруі жайлы арнайы сараптама жүргізіп жатыр. Аты шулы істің соты ендігі айда өтеді. Ал Сатыдағы мектептің директоры өз еркімен жұмыстан кетті. Оның оқу ісі және тәрбие ісі жөніндегі орынбасарлары болса, жұмыстан босатылды.
Жиынға қатысқан Алматы облысындағы бала құқықтары жөніндегі уәкіл Айгүл Есімбекова болса, балалар арасында буллинг былтыр да болғанын айтты.
Десе де, аудан әкімінің міндетін атқарушы оқушылардың жағдайы бірқалыпты екенін және істің бақылауға алынғанын алға тартты.
Сондай-ақ Айгүл Есімбекова психологиялық тестілеудің нәтижелеріне сәйкес, Кеген ауданында 17 баланың суицидке бейімдігі анықталғанын айтты. Бүгінгі таңда ол оқушылармен психологтар жұмыс істеп жатыр.
Басқосуда өгей әке, өгей ана мәселесі де талқыға түсті. Себебі, елімізде аталған санаттағы адамдардың қатысуымен жасалған қылмыстар саны көбейіп кеткен. Түйіткілге байланысты облыс прокурорының орынбасары Азамат Күреңкей өңірдегі отбасылардың портретін жасауды ұсынды.
«Жобаны қолданысқа енгізу – жоғарыда айтылғандай оқыс оқиғалардың алдын алуға септігін тигізеді. Яғни, біз облыста тіркелген отбасылардың қандай жағдайда өмір сүріп жатқанын, немен күн көріп отырғандарын зерттеп, арнайы тізім жасаймыз», – деді Азамат Күреңкей.
Өз кезегінде облыс әкімінің бірінші орынбасары Нұрлан Әбдірахым аудандағы мамандарға әр жағдайды уақытылы жеткізіп отыруды, оқушылардың арасындағы құқықбұзушылықтың алдын алу жұмыстарын күшейтуді тапсырды.
