Egovpress Telegram-арнасында жарияланған бейнежазбада Қаскелең кәсіби-техникалық колледжінің студенттері өз қатарласына күш көрсетіп жатқаны көрсетілген. Оқиға қоғамның наразылығын туғызып, кеңінен талқыланды.
Алматы облыстық полиция департаменті бұл фактіге қатысты пікір білдіріп, оқиғаның 2024 жылғы 24 сәуірде болғанын мәлімдеді.
«Кәмелетке толмағандардың ата-аналары балаларды тәрбиелеу бойынша міндеттерін тиісінше орындамағаны үшін әкімшілік жауапкершілікке тартылды. Жасөспірімдермен және олардың заңды өкілдерімен құқық бұзушылықтың салдары жөнінде профилактикалық түсіндіру жұмыстары жүргізілді», — деп атап өтті полиция өкілдері.
Аталған жағдайға байланысты ҚР Оқу-ағарту министрлігінің баспасөз қызметі де ресми ақпарат таратты.
«Төбелеске қатысқан барлық студент қыздар анықталды. Олардың ата-аналарына Әкімшілік құқық бұзушылық туралы кодекстің «Кәмелетке толмағандарды тәрбиелеу жөніндегі міндеттерді орындамау» бабы бойынша шара қолданылды», — делінген министрлік хабарламасында.
Құзырлы органдардың мәліметінше, бұл жағдай жіті бақылауға алынып, жауапты тұлғаларға қатысты тиісті шаралар қабылданған.
