Ұстаз үмітін арқалаған сол жас түлектердің 1 433-і «Алтын белгі» төсбелгісіне үміткер болса, 1 513 оқушы «Үздік аттестат» алуға ниетті.
Оқу мен тәрбиені, білім мен ізденісті, арман мен жауапкершілікті қатар арқалаған түлектер алдағы Ұлттық бірыңғай тестілеуге дайындалуда. Биыл облыс бойынша 14 123 оқушы тест тапсырады.
Алматы облыстық білім басқармасы басшысының орынбасары Диана Онбырбаеваның айтуынша, 2024–2025 оқу жылы табысты жылдардың бірі болды. Жергілікті оқушылар 17 халықаралық және 150-ге жуық республикалық білім бәйгелерінде жүлделі орындарға ие болған. Соның ішінде республика бойынша 25 оқушы – бірінші орын, 30 оқушы – екінші орын, 75 оқушы – үшінші орынды иеленген.
Жазғы демалысқа да басымдық беріледі
Бірер күнде барлық мектепте соңғы қоңырау соғылғанымен, білім беру жүйесіндегі жұмыс мұнымен тоқтамайды. Оқушылардың жазғы демалысын ұйымдастыру – білім саласының маңызды бағыттарының бірі.
Диана Онбырбаеваның айтуынша, жаз мезгілінде облыста 30 лагерь жұмыс істейді. Оқушылардың 92 пайызы жазғы демалыспен және сауықтырумен қамтылмақ. Әлеуметтік жағынан аз қамтылған және жекелеген санаттағы 2 017 бала мен тәрбиеленушінің демалысын ұйымдастыруға 282,3 миллион теңге бөлінген.
Сонымен қатар, «Қазақстан халқына» қорының қолдауымен жалпы құны 165,6 миллион теңгені құрайтын 1 400 жолдама қарастырылған. Балалар «Тау-Жанашар», «Альтаир», «Облыстық балалар сауықтыру лагері» сынды демалыс орындарында жазғы мезгілді қызықты әрі пайдалы өткізе алады.
Алда тұрған ҰБТ, жазғы демалыс, жаңа белестер – барлығы да түлектер мен оқушылар үшін маңызды кезең. Ең бастысы – әр баланың білім жолындағы сенімді қадамы мен жарқын болашағы.
