Шараның басты мақсаты – тұрғындар арасында экологиялық мәдениетті қалыптастырып, өңірдегі тазалық пен тәртіпті сақтау ісіне үлес қосу.
Сенбілікке 31 907 адам және 3 835 кәсіпорын мен ұйым белсенді атсалысты. Қоғамдық тәртіп пен қоршаған ортаны қорғауға бағытталған бұл шара барысында 1 055 тонна қоқыс шығарылып, 330 арнайы техника жұмылдырылды.
Аталған күнгі сенбілікте өңір аумағында 8 799 түп ағаш отырғызылып, көгалдандыру және абаттандыру жұмыстары жүйелі түрде жүргізілді. Сонымен қатар, 14 538 көпқабатты және жеке тұрғын үйлердің аулалары тазартылып, 101 тарихи-мәдени ескерткіш пен 316 әлеуметтік нысанның айналасы ретке келтірілді.
Сенбілік барысында 30 өзен, көл мен су айдындарының жағалауы қоқыстан тазартылып, табиғи аумақтарды сақтау бағытында кешенді жұмыстар атқарылды.
Бұл игі бастама — өңір тұрғындарының экологиялық жауапкершілігін арттырып, қоршаған ортаның жағдайын жақсартуға бағытталған маңызды қадам. «Таза Қазақстан» акциясы өз жалғасын тауып, еліміздің экологиялық болашағына зор үлес қоса бермек.
