Ауыр жарақат алған жеткіншек Қаскелең қаласындағы аурухананың жансақтау бөліміне жеткізілді. Оқиға 16:30 шамасында болған. Куәгерлердің айтуынша, балалар әдеттегідей футбол ойнап жүргенде алаңға бірнеше ит кіріп кеткен. Балалардың көпшілігі қашып үлгергенімен, Максим есімді балаға үш ит – екі овчарка мен бір питбуль шабуыл жасаған.
Иттерді ажырату біраз уақыт алған. Шабуыл салдарынан баланың құлағы жұлынып, жамбасы жыртылып, басынан ауыр жарақат алған. Қазіргі уақытта дәрігерлер оның өмірін сақтап қалу үшін күресіп жатыр.
Оқиғаға байланысты Алматы облыстық полиция департаменті Қылмыстық кодекстің 104-бабы («Абайсызда ауыр зиян келтіру») бойынша іс қозғап, сотқа дейінгі тергеуді бастады.
«Қазіргі таңда оқиғаның барлық мән-жайы жан-жақты зерттелуде. Куәгерлерден жауап алынды, тиісті сараптамалар тағайындалды. Сараптама қорытындысына сәйкес процессуалдық шешім қабылданатын болады», – делінген полицияның ресми хабарламасында.
Сонымен қатар, иттердің иелері мен жауапты тұлғалардың әрекетіне құқықтық баға берілетіні және кінәлілер заң талаптарына сәйкес жауапкершілікке тартылатыны айтылды.
Қазіргі уақытта тергеу жалғасып жатыр.
