Бұл жоба – мобильді байланыс, жоғары жылдамдықты интернет, бейнебақылау, көше жарығы және басқа да цифрлық шешімдерді қамтитын көпфункционалды телекоммуникациялық құрылымдарды құруды көздейді.
Бастама облыстың Цифрлық технологиялар басқармасы мен байланыс операторлары арасында жасалған ынтымақтастық туралы меморандум аясында жүзеге асырылып жатыр. Жобаның операторы — телекоммуникациялық шешімдерге маманданған «NEW TOWERS» ЖШС.
Президент тапсырмасы аясындағы нақты қадам
Аталған жоба Мемлекет басшысының елді мекендерде сапалы цифрлық инфрақұрылым қалыптастыру және бірыңғай сәулеттік келбет жасау жөніндегі тапсырмаларын орындауға бағытталған. Жобаның маңызды бағыты — ҚМТ өндірісін өңір ішінде жергіліктендіру арқылы технологиялық тәуелсіздікті нығайту.
Қос мақсатты тіректер қалалық ортаға үйлесімді енгізіліп, жеке-жеке орнатылатын инфрақұрылым санын азайтады. Сонымен қатар, олар тұрғын үйлердің шатырына базалық станциялар орнатуға қатысты тұрғындар наразылығын болдырмайды. Барлық жабдықтар арнайы жобаланған, экологиялық және сәулет талаптарына сай келетін нысандарға орналастырылады.
Бір тірек – бірнеше қызмет
Жаңа үлгідегі тіректер бір уақытта екі-үш байланыс операторына қызмет көрсете алады. Бұл тығыз құрылыс аймақтарында да, шалғай ауылдық жерлерде де сапалы байланысты қамтамасыз етуге мүмкіндік береді. Монтаждау жұмыстары экологиялық нормаларға толық сәйкес жүргізілуде: антенналар 25–26 метр биіктікте орналасқан, сәуле шығару аймағы қауіпсіз деңгейде. Жобаға қажетті барлық рұқсаттар мен экологиялық қорытындылар алынған, құрылыс стандарттарының сақталуын «NEW TOWERS» ЖШС қадағалап отырады.
Цифрлық трансформация – ортақ мақсат
Базалық станцияларды біріктіріп орналастыру есебінен инфрақұрылым қайталануын болдырмау және ресурстарды тиімді пайдалану көзделіп отыр. Алдағы уақытта ҚМТ-ның отандық өндірісі іске қосылып, бұл өңірге жаңа жұмыс орындарын ашуға, индустриялық өсімге серпін беруге мүмкіндік жасайды.
Алматы облысы цифрлық болашаққа батыл қадам жасауда. Облыс әкімі инвесторларды өңірдің цифрлық трансформациясына белсенді қатысуға шақырды. «NEW TOWERS» ЖШС-нің жобасы – еліміздің «ақылды» қалалар мен технологиялық даму жолына бет алғанын айқындайтын нақты әрі стратегиялық маңызды қадам.
