Көмекке зәру төрт ер адам – 24 және 25 жастағы азаматтар – 3 450 метр биіктікте өз күшін дұрыс бағаламай, қатты әлсіреп, құрысу белгілері пайда болған соң 112 нөміріне жүгінген.
Министрлік мәліметінше, туристер төменге түсу барысында физикалық әлсіздікке тап болып, геолокацияны жіберіп, құтқару тобын күткен. Оқиға орнына дереу «Медеу» құтқару бекетінен арнайы топ аттанған.
Құтқарушылар алдымен Безымянное шатқалына дейін техникалық көлікпен жетіп, ары қарай жаяу жолмен тауға көтерілген. Тәжірибелі мамандар түнгі уақытта шектеулі көрініспен, күрделі таулы рельефті еңсере отырып, туристерге жетіп, оларды «Шымбұлақ» тау-шаңғы курортына дейін қауіпсіз жеткізген.
Құтқару операциясы сәтті аяқталды, зардап шеккендерге медициналық көмек қажет болмады.
Төтенше жағдайлар министрлігі тауға шықпас бұрын ауа райын мұқият бақылауға, бағыт пен күшті дұрыс есептеуге және арнайы құрал-жабдықтарды пайдалануға кеңес береді.
