Оның мәліметінше, Алматы облысында 2023 жылғы қаңтар мен тамыз айлары аралығын есептесек, өткен жылғы дерекпен салыстырғанда ішкі туризмнің 13% артқаны байқалады. Былтыр өңірге 960 000 демалушы келсе, биыл 1,1 млн демалушы келген.
Туристер ағыны мен миграцияға мониторинг жүргізетін «eQonaq» ақпараттық бағдарламаның дерегіне сүйенсек, Алматы облысы келушілер саны бойынша Алматы (47,2 мың) мен Астана (22,4 мың) қалаларынан кейінгі 3-орынға тұрақтаған.
Сонымен қатар Айбар Теменов облыста ұйымдастырылған шаралардың арқасында бюджетке түскен салық мөлшерінің өскенін айтты.
«Шетелдік туристерден түсетін салық – Bed tax көрсеткіші 68,2 мың теңгеден 3,1 млн теңгеге дейін жетті. Бұл – Қытай мен Оңтүстік Кореяда өткізілген маркетингтік кампанияның және өңірде ұйымдастырылған ауқымды шаралардың нәтижесі. Оның қатарында «Qonaev International Balloon Fest», «Adrenaline Tengri Ultra», BBC News арнасында көрсетілген жарнама, «Tripadvisor» сайтында жарияланған баннер және т.б. бар», – деді басқарма басшысы.
Маманның айтуынша, өңірде 300 шақырымнан астам туристік жолға жөндеу жүргізіліп, абаттандырылып жатыр.
Аталғандардан бөлек, Алматы облысында 2023-2026 жылдар аралығында туризмді дамыту үшін Бас жоспар әзірленген. Құжатта мақсат-мүдделер айқындалған. Сондай-ақ әр ауданның даму әлеуеті басты назарға алына отырып, жол картасы дайындалған. Нәтижесінде ауылдар мен аудандардағы туризм нарығының қысқа мерзімдік тенденциялары, жоба, жоспарлары анықталған.
