Былтыр қарашада «Атамекен» Ұлттық кәсіпкерлер палатасында парниктік газдар шығарындыларын сіңіру жөніндегі келісімге қол қойылып, Қазақстан үшін тың бағыттағы экологиялық инвестициялық жобаның іргетасы қаланды. Бұл бастама жеке инвестициялар арқылы қаржыландырылып, халықаралық стандарттар негізінде көміртек бірліктерін сату механизмін қамтиды.
Қазақстан халқының бірлігі күні және «Таза Қазақстан» ұлттық экологиялық акциясы аясында аталған өңірде 10 мыңнан астам ағаш отырғызылды. Терек, жабайы өрік, «Сириус» сынды жергілікті түрлер экожүйеге бейімделген. Экологиялық шараға Алматы облысының әкімі Марат Сұлтанғазиев, «Атамекен» ҰКП басқарма төрағасы Райымбек Баталов, SAFC компаниясы мен ғылыми-аграрлық институт мамандары, еріктілер мен жергілікті тұрғындар белсенді атсалысты.
Жоба аясында деградацияға ұшыраған 1 500 гектар алқапқа 3,5 миллионнан астам ағаш көшеті отырғызылады. Бұл орман алқаптары көміртек ізін азайтып, өңірдің микроклиматын жақсартуға, сондай-ақ ауыл шаруашылығына жарамды жерлерді қалпына келтіруге сеп болады. Тамшылатып суару жүйесі арқылы су үнемдеу, өнімділік арттыру және климаттық тұрақтылықты қамтамасыз ету көзделген.
Алматы облысының әкімі бұл бастаманың экономикалық пайдасымен қатар әлеуметтік және агроэкологиялық маңызына ерекше тоқталды:
– Бұл – көміртек кредиттерін қалыптастыру жолындағы алғашқы ауқымды жоба. Орман жолақтарының арасында егін егуге болады. Сонымен қатар жобаның арқасында көшет шаруашылықтарына сұраныс артады, жаңа жұмыс орындары ашылады, – деді ол.
SAFC компаниясы мен еуропалық SEFE Marketing & Trading серіктестігінің бірлесуі арқасында жоба CCB Gold және Abacus халықаралық стандарттары бойынша сертификаттаудан өтіп жатыр. Келесі 30 жылда бұл экологиялық бастама 1 миллион тоннадан астам көмірқышқыл газын атмосфераға шығармай, климат өзгерісіне қарсы күресте маңызды рөл атқарады.
«Атамекен» ҰКП төрағасы Райымбек Баталов жобаның көпқырлы мүмкіндіктеріне тоқталды. Болашақта италиялық серіктестермен бірге қызанақ өсіру, «Еділбай» тұқымды қой шаруашылығын дамыту және суды үнемдеу технологияларын енгізу сынды бірнеше бағыт қамтылмақ. Бұл шаралар аграрлық сектор мен «жасыл» экономикаға серпін беріп, тұрақты жұмыс орындарын ашуға мүмкіндік береді.
Бұл экологиялық бастама БҰҰ-ның тұрақты даму мақсаттарының алтауы бойынша елдің міндеттемелерін қолдайды: климаттық әрекеттер, жерді қалпына келтіру, экономикалық өсім, «жасыл» энергетика, су ресурстарын тиімді пайдалану және халықтың әл-ауқатын арттыру.
«Таза Қазақстан» акциясы аясында Алматы облысында да ауқымды жұмыстар жүргізілуде. Биылғы көктемде ғана 186 мыңнан астам адам қатысып, 6 300 тонна қоқыс жиналды, 70 мың ағаш отырғызылып, түрлі ағаш тұқымдарының 13 келі дәні себілді.
Бұл жобалар тек қоршаған ортаны қорғауға емес, елдің болашағына инвестиция салуға бағытталған. Жасыл белдеулер, таза ауа, жаңартылған жер – ұрпаққа қалатын баға жетпес мұра.
