Мерекелік шараға әр ауданнан 9 жастан 13 жасқа дейінгі әлеуметтік осал топ санатындағы отбасылардан шыққан, ата-анасының қамқорлығынсыз қалған, республикалық және халықаралық пәндік олимпиадаларда, спорттық жарыстарда жеңімпаз атанған 200-ден астам бала қатысты.
Алматы облысының әкімі Марат Сұлтанғазиев балақайларды Жаңа жыл мерекесімен құттықтап, оларға ақ тілегін арнады.
«Еңбек болмаған жерде талант – фейерверк секілді. Жарқ етеді де, тез сөніп қалады. Жетістіктің кілті – еңбекқорлықта. Адамның бойында дарыны болмаса да, еңбектің арқасында үлкен белестерді бағындыруға болады. Әсіресе, балалар бәсекеге қабілетті болуы тиіс. Қазір елімізде оқушылар үшін көп мүмкіндіктер қарастырылған. Тек өзі туған жерінде танымал болып қана қоймай, әлемді бағындырған адамдар баршылық. Бәріңізге соны тілеймін! Жаңа жыл бәріңізге бақыт әкелсін! Оқуда озат, спортта чемпион болуларыңызға тілектеспін!», – деді облыс әкімі құттықтау сөзінде.
Сонымен қатар өңір басшысы еліміздің Президенті Қасым-Жомарт Тоқаевтың балаларға мол сенім артып отырғанын айтып, Мемлекет басшысының атынан әр балаға 100 мың теңге ақшалай сертификат, Президенттің құттықтау сөзі жазылған хатын, Х. Андерсеннің ертегі кітабын, заттай сыйлық табыс етті.
«Президенттік шыршаға келгеніме қуаныштымын. Өте қызық өтіп жатыр. Мені осындай шараға шақырған адамдарға рақмет айтқым келеді», – деді Ш. Смағұлов атындағы мамандандырылған физика-математика лицей-интернатының оқушысы Аяулым Ізтілеу.
Ал тілшілерге сұхбат берген Іле ауданындағы мектеп-лицейдің оқушысы Мадина Төлендінің айтуынша, балалар бүгінгі мерекелік кештен керемет әсер алған.
«Мен де Президенттік шыршаға бірінші рет қатысып отырмын. Мультфильмдердің, кинолардың кейіпкерлерінің киімін киген аниматорлар, бишілер, әншілер жақсы көңіл-күй сыйлады. Ұйымдастырушыларға алғысымды білдіремін!», – деді Мадина Төленді.
Президенттік шыршада мың бұралған бишінің де, әншінің де қарасы көп болды. Балалар үйлеріне ерекше сезімге бөлене тарқасты.
Посмотреть эту публикацию в Instagram
