«Қонаев Көркейту» ШЖҚ МКК директоры Қанат Азаматовтың айтуынша, полигонда көлемі 30 текше метрді құрайтын су жинақтаушы резервуар салынуда. Бұл нысан өрт қауіпсіздігін қамтамасыз ету үшін қажет. Бұдан былай өрт шыққан жағдайда су жеткізуге уақыт жоғалтпай, дереу сөндіру шараларын жүргізу мүмкіндігі болады. Бұған дейін полигонда мұндай инфрақұрылым қарастырылмаған еді.
Сонымен қатар, өрттің алдын алу мақсатында арнайы техника тәулік бойы кезекшілікке қойылады. Бұл шара қауіпсіздікті күшейтумен қатар, өрт ошақтарын жедел сөндіруге мүмкіндік береді.
Санитарлық талаптарға сәйкес, полигонның айналасына қоқыстардың ұшуын және малдың кіруін болдырмау үшін ор қазылып, темір тормен қоршау жұмыстары жүргізілуде. Белгілі бір учаскелерге бетон қоршаулар орнатылып жатыр.
Экологиялық жағдайды жақсарту мақсатында полигонның алдыңғы беті көгалдандырылып, арнайы техника үшін таразы орнатылады. Сондай-ақ, көліктерге арналған жуу аймағы да жабдықталатын болады.
Жаңғырту жұмыстары полигонның санитарлық-экологиялық талаптарға сай жұмыс істеуіне және қаланың экологиялық жағдайын жақсартуға оң әсерін тигізеді деп күтілуде.
