«Кәріз жүйесі мәселесі біздің министрлік құзіретіне жатпайды. Дегенмен, қалдық судың шешілмеген шырғалаңы жаңа тазалау жүйесі салынбағанға дейін үлкен экологиялық проблемаға әкелуі мүмкін. Осы кездесуден кейін Экология министрлігі 100 пайыз тозығы жеткен стансаның орнына басқасын салу туралы ҚР Премьер-министрі Әлихан Смайыловқа ұсыныс хат дайындайды. Аталған түйіткіл тез арада өз шешімін табуы керек», – деді министр.
Айта кетейік, бұл станса Қонаев қаласынан 6,2 шақырым жерде орналасқан. 1968 жылы бой көтерген. Тәулігіне 25,4 мың метр куб суды тазалауға қауқары жетеді. Кәріз суы механикалық жолмен, яғни, бір жерден-бір жерге құйып, сүзгілеу арқылы тазаланады. Құрамында жалпы саны 17 сорғы стансасы бар. Жалпы ауданы – 216,4 га, ұзындығы – 171,6 шақырым. Қазіргі таңда барлық құбырлар, құм және тұнба алаңдары 100 пайыз ескірген.
