Қазақстандық азамат өз бүйрегін интернет арқылы кездейсоқ сатып алушыға 18 мың долларға бағалаған. Ал ағзаны алу бойынша барлық шарттарды реципиент ұйымдастыру керек болған.
«Танымал әлеуметтік желідегі ерекше хабарландыруға Ақмола облысы полиция департаментінің Ұйымдасқан қылмысқа қарсы күрес басқармасының қызметкерлері жауап беріп, донормен байланысқа шықты. Бірнеше апта бойы полицейлер арнайы жедел-іздестіру іс-шараларын жүргізді, нәтижесінде трансплантация жасау және төлем жасау туралы мәміле жасалды. Көкшетауда ҰҚҚКБ қызметкерлері қолма-қол ақша беру кезінде күдіктіні ұстады», — деп хабарлады полиция.
Алғашқы тергеу әрекеттері аясында полицейлер ер адамның Ақтөбенің тумасы екенін, бірақ елордада тұратынын анықтады. Ұсталған азамат мұндай қадамға құмар ойынға тәуелділіктің кесірінен көптеген қарызға батқандықтан бармақ болғанын айтты. Қазіргі уақытта аталған факті бойынша сотқа дейінгі тергеу жүргізілуде.
