Салтанатты ашылу рәсіміне Алматы облысы Денсаулық сақтау басқармасы басшысының орынбасары Лейла Серікбаева мен Қонаев қаласы әкімінің орынбасары Сәуле Нұрсолтанова қатысып, жұртшылықты қуанышты күнмен құттықтады.
Заманауи талаптарға сай жаңартылған амбулатория бір ауысымда 100 адамға дейін қабылдауға қауқарлы. Мұнда жалпы тәжірибе дәрігерлері, педиатр, балалар тіс дәрігері, мейірбикелер мен кіші медициналық қызметкерлер жұмыс істейді. Ал гинекологтар Қонаев қаласынан арнайы кесте бойынша келіп, қызмет көрсетеді.
Мекеме УДЗ, рентген, зертхана секілді заманауи құрал-жабдықтармен жабдықталған. Жедел жағдайларда науқастар дереу қалаға жеткізіледі. Енді Шеңгелді ауылдық округіне қарасты 6 елдімекеннің 7 мыңға жуық тұрғыны сапалы медициналық көмекке қол жеткізе алады.
Бұл – Мемлекет басшысының халықтың өмір сүру сапасын арттыруға бағытталған тапсырмаларын іске асырудағы маңызды қадам. Алдағы уақытта ауылдық жерлердегі медициналық инфрақұрылымды дамыту жұмыстары жалғасын табады.
Ашылу шарасы Наурыз мейрамымен тұспа-тұс келіп, ауылда киіз үй тігіліп, ақ дастархан жайылды. Ауыл тұрғындары бір-біріне ақ тілектерін арнап, қуанышты күнді бірге атап өтті.
«Бұрын осы жерде өзім де еңбек еткенмін. 1970 жылы іргесі қаланған нысан бүгін мүлде жаңарып, ел игілігіне қайта беріліп отыр. Өте қуаныштымын. Ауылымыз гүлденіп, жақсылықтар көбейе берсін!», – деді тұрғын Қарлығаш Қосбаева.
Шара аясында Қонаев қаласының өнерпаздары ауыл тұрғындарына арнап шағын концерттік бағдарлама ұсынды.
