Өңірдегі негізгі кәсіпорындардың бірі — Маревен Фуд Тянь-Шань ЖШС зауыты. Жылдық өндірістік қуаттылығы 159 мың тоннаны құрайтын кәсіпорын бүгінге дейін экономикаға 35 млрд теңге көлемінде инвестиция салған.
Компания ішкі нарықтағы сұранысты толық қамтамасыз етіп қана қоймай, жаһандық жеткізу тізбектеріне табысты кірігіп отыр. Қазіргі таңда өнімнің шамамен 40%-ы Орталық Азия елдері мен Еуропа нарығына экспортталады.
Кәсіпорында өндіріс ауқымын кеңейту жоспарланып отыр. Атап айтқанда, 2026 жылы құны 4,5 млрд теңге болатын жаңа өндірістік желіні іске қосу көзделген. Бұл жоба аясында 100 жаңа жұмыс орны ашылады.
Ал 2027 жылға қарай инвестиция көлемі 20 млрд теңгені құрайтын үшінші кезеңнің құрылысы жоспарланған. Оның нәтижесінде тағы 200 адам жұмыспен қамтылмақ. Компания мәліметінше, қазіргі уақытта қызметкерлердің 99%-ын Қазақстан азаматтары құрайды.
Мамандардың айтуынша, аталған жобалар өңірдің өңдеу өнеркәсібін дамытуға, экспорт көлемін арттыруға және жаңа жұмыс орындарын құруға елеулі үлес қосады.
