USDМұнда табиғи таза былғары мен иін қандыра өңделген күдеріден әдемі бас киімдер тігіледі. Аталған кәсіпорын 2020 жылдан бастап ресми тіркеліп, жұмысын жүргізуде. Ең алдымен бұл кәсіпті Нұрланның әкесі Ерқайрат қолға алған. Ол 90-жылдардағы өтпелі кезеңде күзен терісінен жасаған бұйымдарын Алматы базарларында саудалаған.
Жиырма жылдан астам уақыт шұғылданған кәсібіне әбден машықтанған ауыл азаматы шеберлігін шыңдап, мол тәжірибе жинақтады. Кейін бұл істі баласы Нұрланға тапсырды. Әкенің барлық білімі мен дағдыларын үйренген ол кәсіпкер жолын сәтті жалғастырды.
Жас кәсіпкер 2018 жылы ауылдан екі цехы бар үлкен коттедж тұрғызды. Өндіріс орнындағы құрал-жабдықтарды заманға сай жаңарту үшін банктен несие алды. Онда «Кәсіпкерлікті дамыту жөніндегі 2021-2025 жылдарға арналған ұлттық жоба» бағдарламасы шеңберінде 14,75 пайыздық мөлшерлеме субсидияланды және «Даму» қорының кепілдігі берілді.
Көлемі кеңейген цехта былғары және күдері бұйымдары, күзен терісінен жасалған бас киімдер тігіледі. Өнімдері еліміздің түкпір-түкпіріне саудалануда.
Күдері – жұмсақ етіп, ерекше тәсілмен өңделген терінің бір түрі. Әбден иі қанып, жұмсартылып дайындалатын тері бұғы, бұзау, елік, басқа да жануардан алынады. Ол суыққа өте төзімді. Күдеріні әртүрлі түске бояуға болады. Одан сырт киім, аяқкиім, қолғап та тігіледі.
