Салтанатты шара барысында агенттік төрағасы үздік ауыл әкімдерін өз қызметінде халықтың сұранысына сай ашық, адал болуының маңыздылығын айтты. Және ол аталған байқаудың ауылдарды дамытуға оң септігін тигізетініне сенім білдірді.
Конкурс қорытындысы бойынша Түркістан облысы Шардара ауданы Жаушықұм ауылдық округінің әкімі Нұрбақыт Нұрсейтов «Үздік ауыл әкімі» атағын иеленді.
2-орынға Павлодар облысы Успен ауданы Новопокровск ауылдық округінің әкімі Вячеслав Симоненко, 3-орынға Ақтөбе облысы Шалқар ауданы Айшуақ ауылдық округінің әкімі Оралбек Әбшанов табан тіреді.
Номинация бойынша жеңімпаз атанғандар тізімі келесідей:
- «Үздік шаруашыл әкім» – ШҚО, Ұлан ауданы Аблакет ауылдық округінің әкімі Арыслан Агланбеков;
- «Үздік ашық әкім» – Қарағанды облысы Нұра ауданы Баршын ауылдық округінің әкімі Зәуре Мұханалиева;
- «Үздік әлеуметтік жоба» – СҚО, Аққайың ауданы Шағалалы ауылдық округінің әкімі Гүлмира Добромирова.
Байқау жеңімпаздары мен номинация иегерлері Мемлекеттік қызмет істері агенттігі төрағасының Құрмет грамотасымен марапатталды.
Айта кетейік, конкурсқа қатысу үшін еліміздің түкпір-түкпірінен 100-ге жуық ауылдық округінің әкімдері өтінім берді. Байқау өңірлік және республикалық кезеңдер бойынша өткізілді.
Өңірлік кезеңде әкімдер елді мекендердегі халықтың өмір сүру жағдайын жақсартуға бағытталған жобаларын қорғады. Екінші кезеңде ауыл әкімдерінің кез келген мәселе туындаған кезде қалай әрекет ететініне, проблеманы шешу қабілетіне баға берілді.
