Бұл оқу ошағы Болат Өтемұратовтың қоры арқылы қаржыландырылып, «Верный капитал» компаниясының қолдауымен салынбақ. Оған 8,1 млрд теңгеден астам қаржы жұмсалмақ. Ал мектептің ауданы – 12,5 мың шаршы метр. Оқу кабинеттерімен қатар, мектеп рекреациялық аймақтармен, оқу-өндірістік шеберханалармен, спорт және гимнастика залдарымен, ақпараттық орталықпен, зертханамен, шығармашылық студиясымен және коворкинг-кеңістігімен жабдықталады.
«Мектеп салу – әлеуметтік маңызды міндет. «Верный капитал» компаниясы, Forte Bank және Болат Өтемұратов Қоры мемлекеттік үлгідегі классикалық мектептерді ғана емес, әлемдік стандарттарға сәйкес келетін, заманауи оқу орындарын сала отырып, мектеп тапшылығы мәселесін шешуге үлес қосады», – деді Болат Өтемұратов қорының Қамқоршылық кеңесінің төрағасы доктор Алмаз Шарман.
Өңір басшысы Марат Сұлтанғазиев демеушілерге алғысын білдірді.
«Облыста үш ауысымды мектеп және оқушы орнының тапшылығын жою мақсатында 16 мектеп салынып жатыр. «Жайлы мектеп» ұлттық жобасы аясында 53 мектеп салу жоспарланды. Бүгін міне, демеушілер қаржыландырып, 900 орындық жаңа мектептің іргесін қаланды. 33 мыңнан астам тұрғыны бар Есік қаласы ғана емес, жалпы облысымыз үшін бұл керемет сыйлық, зор қуаныш. Барша тұрғындар атынан демеушілерге алғысымды білдіремін», – деді облыс әкімі.
Мектеп құрылысы 2024 жылдың қыркүйегіне аяқталып, мемлекет балансына беріледі деп жоспарланып отыр.
Былтыр Алматы облысының әкімдігі отандық бизнесмендер мен меценаттарды «Жайлы мектеп» жобасы аясында жаңа мектептердің құрылысын қаржыландыруға шақырған. Бүгінде кәсіпкерлер қолдауымен Есік пен Шелекте мектеп салынып жатыр.
