Бейсенбі күні елордалық мәслихаттың кезектен тыс сессиясы барысында Нұр-Сұлтан қаласын – Қазақстанның елордасын Астана қаласы деп қайта атау туралы мәселе қаралды. Депутаттар шешімнің жобасын бірауыздан қолдады.
Бұдан әрі мәслихат шешімі Қазақстан Үкіметі жанындағы Республикалық ономастика комиссиясының қарауына жіберілетін болады. Ел Үкіметі мен Президенті де өз шешімін шығаруға тиіс. Астананы ресми түрде қайта атау Мемлекет басшысы Президенттің тиісті Жарлығына қол қойғаннан кейін жүзеге асырылады. Ал осы уақытқа дейін Қазақстанның астанасы бұрынғысынша Нұр-Сұлтан деп аталады.
Мәслихатта айтылғандай, бұл мәселе бойынша барлығы 17 ұсыныс келіп түскен. Сондай-ақ әлеуметтік желі қолданушыларының 80% бұрынғы атауын қайтаруды қолдайды.
2 қыркүйекте қалаға бұрынғы атауын қайтару қажеттілігі туралы Мәжілістің «Жаңа Қазақстан» депутаттық тобының мүшелері айтты.
«Адамның көзі тірісінде қалаға оның есімін берген дұрыс деп есептемейміз және қаланың жаңа атауын халық та қабылдамады. Сондықтан тұңғыш президенттің өзі ұсынған Астана атауын қайта қалпына келтіру – тарихи әділдік болар еді», — делінген депутаттық топтың хабарламасында.
Өз кезегінде Мемлекет басшысының баспасөз хатшысы Руслан Желдібай бұл ұсыныс Мемлекет басшысының келісімімен Конституциялық заң жобасына енгізілгенін хабарлады.
