Жедел жәрдем қызметі дәрігерлерінің айтуынша, Ынтымақ ауылынан үш адам жүгіріп шыққан.
«Жолға шыққандардың екеуі кері қашып кеткен. Біреуін көлік қаққан. Апат құрбаны болған жігіт бірнеше метрге ұшып кеткен. Аяғы жұлынып қалған. Бір аяқ киімі көліктің үстінде қалған», – дейді жедел жәрдем қызметкері.
«5 – қазан күні сағат 08:30 шамасында, «Хюндай» автокөлігінің 44 жастағы жүргізушісі «Алматы-Өскемен» автожолымен оңтүстік бағытта келе жатып, 19 км-де 20 жастағы жаяу жүргіншіні қағып кеткен. Жол – көлік оқиғасы салдарынан жаяу жүргінші оқиға орнында қаза тапты. Жаяу жүргінші белгіленбеген жерден жолды кесіп өткен», – дейді Алматы облысы ПД баспасөз қызметі.
Айта кетейік, аталған автобанда рұқсат етілген жылдамдық 140 км/сағ. Оқиға болған жерде жаяу жүргіншілерге арналған белгі жоқ. Аталған факт ҚР ҚК-нің 345-бабы 2-бөлігіндегі қылмыстық құқық бұзушылық белгілері бойынша Іле ауданының ПД-да тіркелді.
Қазіргі уақытта іс бойынша қажетті тергеу әрекеттері жүргізіліп, сараптамалар тағайындалды.
