Посмотреть эту публикацию в Instagram
«Төрт балам бар, 4 саяжайда тұрамын. Екі балам мектепке барады. Автобусты көп күтпегенімен, балам жылдағыдан кешігіп кеп жүр үйге. «Неге кеш келдің, сабақ 1-де біткен. Балалармен ойнап кеттің ба?», — десем, «ойнамадық, бір автобусты жіберіп барып, екіншісіне міндік», — деп жауап берді балам. Оқу жылының басталғаны қазір ғана. Күн жылы. Қақаған қыста балаларымыз аялдамада бүрсең қағып тұра ма? Қонаев облыс орталығы болмағанда жағдай жақсы болатын. Алға жылжудың орнына, артқа кетіп барамыз», — дейді атын жасыруды сұраған көпбалалы ана.
Сондай-ақ, тұрғындардың айтуынша, еңбекақы көлемі — аз, одан бөлек, зейнеткерлер бар. 4 және 7 саяжайдан қалаға барып-келу үшін таксиге 2000 теңге керек. Бұны жұмыс жасайтын 22 күнге көбейткенде, тек жолға 44000 кетеді. Жұрттың қалтасы бұндай шығынды көтермейді.
Халықтың тағы бір уайымы — коронавирус. Олардың шағымына қарағанда, Қазақстанда коронавирустың жаңа дерегі күнде тіркеліп, жұрт күнде ауру жұқтырып жатқанда — автобуста сығылысып, бұрыла алмайтын халде жол жүру — дұрыс емес.
Аталған мәселеге Алматы облысы жолаушы көлігі және автомобиль жолдары басқармасының айтар өз уәжі бар.
«Қазір 6 автобус 10 минут интервалмен жүріп жатыр. Ешқандай адам сыймай қалған, көп күткен жағдай бүгінге тіркелген жоқ. Кей автобустар істен шығып, қатарға қосылмай қалады. Сонда мәселе туындауы мүмкін. Бір видеоға бола ылғи жағдай сондай екен деуге болмайды. Ал оқушыларды тасымалдау — білім басқармасының құзіретінде. Ол туралы жауап бере алмаймын. Көш жүре түзеледі дегендей, ауданаралық, қалалар арасындағы маршруттарды ретке келтіру бойынша шараларды қолға алып жатырмыз. Және Қонаев ішінде де жаңа маршруттар ашылады», — дейді аталған басқарманың бөлім басшысы Қанат Шарапиев.
Ол тұрғындардың түйіткілді мәселесі алдағы уақытта өз шешімін табатынын айтты.
