USDҚазіргі таңда жұмыстың 95%-ы аяқталған. Осыған байланысты өңір басшысы Марат Сұлтанғазиев саябақты аралап шықты.
Адамдар демалуға арналған жерде екі түрлі фонтан орнатылған. Оның бірі білезік іспеттес жасалып, екіншісі мәрмәр тасынан тұрғызылған. Бұдан бөлек, жерге төселген тастары ауыстырылып, саябақтың жазуы өзгертілген. Мердігер компания басшысының орынбасары Аслан Жазаевтың айтуынша, күрделі жөндеу кезінде жасылдандыруға ерекше көңіл бөлінген.
«Алдымен қаланың климатын зерттеп алып, кейіннен 5 түрлі ағаштан 584 түп ектік. Жалпы газонымен қосып есептегенде жасылданған жердің аумағы 5200 шаршы метрді құрайды. Ал парктің көлемі – 8 гектар. Күрделі жөндеуге 984 млн теңгеден астам қаржы жұмсалды», – деді компания өкілі.
Парктегі сахна мен көрермен отыратын жер де толығымен жөндеуден өткен. Мұнда кәсіпкерлер сауда жасауы үшін біркелкі дүңгіршектер орналастырылады. Оған бюджеттен қаражат бөлінбейді. Саудагерлер өз қаржысына салып, жан-жағын күтіп ұстайтын болады.
Тағы бір өзгеріс – футбол алаңы мен спорт алаңының тұрғызылуы. Алаң салу үшін құжаттарға өзгеріс енгізу керек болған. Сондықтан саябақтың ашылуы кейінге шегерілген.
Сондай-ақ парктің жарық бағаналары ауыстырылып, заманауи шамдар орнатылған. Тұрғындар отырып демалатын 160 орындық қойылған. Мұнда кафе, балаларға арналған батут, көліктер де бар. Олар жеке кәсіпкерлердің иелігінде.
Көрсе көз тартар саябақты аралаған облыс әкімі ағаштардың міндетті түрде күтімі жақсы болу керек екенін айтты.
