Қалалық Білім басқармасының басшысы Ләззат Жылқыбаеваның сөзінше, Алматыда 1 тамызда «Мектепке жол» республикалық акциясы басталады.
«Биыл акция 30 қыркүйекке дейін «Мектепке жол – шекарасыз жақсылық» ұранымен жалғасады. Ол аз қамтылған және көпбалалы отбасылардан шыққан оқушыларға, жетім балаларға, ата-ана қамқорлығынсыз қалған балаларға оқу жылының басталуына дайындық кезінде материалдық қолдау көрсетуге арналған. Сонымен қатар, әлеуметтік себептер бойынша балалардың мектепке келмеуінің алдын алуға бағытталған», – деді ол.
Қазірдің өзінде мектептерде оқушыларға оқу жылына дайындыққа көмек көрсету бойынша жұмыстар жүргізіліп жатыр.
«Көмекке мұқтаж балалардың деректер базасы құрылды. Азаматтардың өтініштеріне жедел әрекет ету үшін шұғыл желілер, сенім телефондарының жұмысы ұйымдастырылды. Телефон номері Алматы қаласы Білім басқармасының сайтында бар», – дейді басқарма басшысы.
Еске сала кетейік, 1 қыркүйектен бастап мемлекеттік мектептердің 1-4 сынып оқушылары тегін тамақтанады.
