Алматы облысында үздік педагогтарды тартуға өтінімдер жинау жүріп жатыр. Педагогтарға тиісті қолдау шаралары ұсынылады,- деп хабарлады Алматы облысы білім басқармасы басшысының орынбасары Айжан Адамбекова.
Өңірде орыс тілі мен әдебиеті оқытушыларының, бастауыш сынып мұғалімдерінің, сондай-ақ «математика», «физика», «химия», «тарих», «информатика», «ағылшын тілі», «биология» және «география»пәндері бойынша ұстаз тапшылығы бар.
«17-26 маусым аралығында конкурстық іріктеуге өтінімдер қабылданады. Қазіргі уақытта 602 жұмыс орнына тапшылық бар. Тестілеудің екі кезеңінен сәтті өткеннен кейін мұғалімдерге тұрғын үй беріледі»,- деді басқарма уәкілі.
Конкурс екі кезең бойынша өткізіледі: компьютерлік тестілеу және эссе жазу,екіншісі-әңгімелесу.
Тестілеу және эссе жазу үміткердің таңдауы бойынша компьютерлік форматта қазақ, орыс немесе ағылшын тілдерінде жүргізіледі. Бейіндік пән бойынша тестте 25 тапсырма бар, эссе көлемі 350 сөзден тұрады. Емтихан 40-тан 80 минутқа дейін. Эссе үшін 50 минут бөлінді. Өтетін орыны Назарбаев Зияткерлік мектептері базасында жүргізіледі.
Конкурстың бірінші кезеңінің нәтижелерін НЗМ ДББҰ күнтізбелік он күн ішінде жүргізеді.
«Үміткерлердің конкурстың екінші кезеңіне қатысуы үшін конкурстың бірінші кезеңі бойынша оң нәтижелердің 60% – ы негізінде болуы керек», – деп атап өтті білім басқармасы.
Айта кету керек, конкурстың бірінші кезеңінің қорытындысы бойынша апелляция өткізілмейді.
Конкурстың екінші кезеңі комиссия күндізгі немесе қашықтықтан әңгімелесу нысанында өткізеді.
Педагогтерді көшіру, орналастыру, еңбек ақы төлеу және қамтамасыз ету мәселелері ынталандыру шаралары есебінен шешілетін болады. Ол лауазымдық жалақының 150% мөлшерінде ақы төлеуді көздейді.
«Жалақы әдеттегі жалақыдан екі есе көп болады», — деп атап өтті спикер.
Естеріңізге сала кетейік, Алматы облысы педагогикалық кадрлар тапшылығы бар өңірлердің қатарына кіреді. Арнайы бағдарлама аясында мемлекет білім беру сапасын арттыру мақсатында өңірге мұғалімдерді тартуды жоспарлап отыр.
Конкурсқа тұрғылықты жеріне қарамастан, тиісті бейіндер бойынша жоғары педагогикалық, жоғары кәсіптік және жоғары оқу орнынан кейінгі білімі бар, сондай-ақ «педагог-сарапшы», «педагог-зерттеуші», «педагог-шебер» біліктілік санаттары бар педагогтер қатыса алады. Негізгі талап гуманитарлық бағыт бойынша үлгерімнің орташа балы GPA 3,5-тен төмен емес, жаратылыстану-математикалық бағыт бойынша 3,2 болуы шарт. Педагогикалық мамандықтар бойынша магистратура түлектері үлгерімнің орташа балы 3,4-тен төмен болмау керек.
