Өзбекстан мен Қытайдан қоныс аударған қазақтар Жамбыл аудандық көші-қон қызметкерлерінің жұмысына наразы. Ата жұрттың азаматы атану арманға айналды деген ағайын «полиция сан түрлі сылтау айтып күнде ертеңмен сандалтады» деп отыр.
Мәселен, Салтанат Телешбаеваны мемлекеттік емханалар тіркеуге алмайды. Басы ауырып, балтыры сыздаса келіншек үйінде емделуге мәжбүр. Үш баласын да жекеменшік балабақша мен мектепке берген. Себебі Өзбекстаннан қоныс аударған әйел азаматтық ала алмай жүр.
«Жекеменшікке барамыз. Басқа жер бізді қабылдамайды. Емделудің өзі қиын. Босандым. Онда да жекеменшікке бардық. 300 мың теңге кетті. Үкіметтің перзентханасына бару үшін құжатымыз жоқ. База істемей жатыр деп бір жыл жүрді. Сосын келдік. Бір жетіден кейін келіңдер. Бір жетіден кейін келеміз. Ертең келіңдер дейді. Сол айтатын әңгімелері», – дейді Салтанат Телешбаева.
Жамбыл ауданында 30-ға жуық қандас бар. Барлығы осы полиция бөлімшесіне күнде келеді. Бірақ оларды «жүйе істен шықты, қызметкер жетіспейді» деп күнде шығарып салатын көрінеді. Айтуларынша, көші-қон қызметкерлері ақша дәметеді.
«Азаматтық алу екі айға созылу керек. Бірақ базаға байланысты созылып кеткен. Ыхтияр хат пен азаматтыққа жауапты қызметкер өзінің өтініші бойынша жұмыстан шеттетілді. Жақын арада орнына адам келеді. Оны басшы құрамы жақын арада шешеді деп ойлаймын», – деді Жамбыл аудандық көші-қон қызметінің аға инспекторы Бақберген Тәттібаев.
Жамбыл ауданында ыхтияр хат, қандас мәртебесі мен азаматтық алу машақатын жіпке тізген ағайын Ішкі істер министріне хат жазды. Олар Марат Ахметжановтан аудандағы көші-қон қызметінің жұмысын реттеп беруді сұрайды.
