Алматы қаласының санитариялық-эпидемиологиялық бақылау департаментіне соңғы уақытта кеміргіштер (егеуқұйрық, тышқан) мен жәндіктердің (тарақан, қандала, маса) көбеюіне байланысты қала тұрғындарынан түсетін шағымдар күрт өскен. Осыған байланысты «Халық денсаулығы және денсаулық сақтау жүйесі туралы» ҚР кодексіне сәйкес профилактикалық дератизацияны ұйымдастыру және жүргізу шараларын Алматы қаласының коммуналдық инфрақұрылымды дамыту басқармасы жүзеге асыратынын хабарлады.
«Қала аумағында және жеке меншік үй иеліктерінде профилактикалық дератизация жылына екі рет, яғни көктемгі және күзгі кезеңдерде жүргізілуі тиіс. Кеміргіштермен байланысты барлық мәселемен аталған басқармаға немесе тұрғылықты жері бойынша аудандық әкімдікке жүгіну қажет», — деп хабарлады ведомстводан.
Сондай-ақ, қалалық СЭБД көп қабатты үйлердің тұрғындарына хабарлама жасады.
«Тоқсанына 1 рет жоспарлы түрде өткізілетін кеміргіштерді жою жөніндегі жұмыстарды тұрғын үйлердің подъездерінде, жертөлелерінде, шатырларында, қоқыс жәшіктерінде және олардың айналасында, сондай-ақ дезинфекциялау ұйымдарын жалдау жолымен кәріз құдықтарында пәтер иелері кооперативтері (ПИК) жүргізуі тиіс. Осыған байланысты көп қабатты үйлердің тұрғындары ПИК басқармасынан осы жұмыстың уақытылы және тиімді орындалуын талап етуге толық құқылы», — деп мәлімдеді СЭБД-дан.
