USD
«Мемлекет дамуының жаңа тарихи кезеңінде билік те, азаматтық институттар да, оның ішінде БАҚ та уақыт талабына сай жаңаша жұмыс істеуге бейімделуі шарт. Түрлі сайттар, интернет-порталдар көбейді. Ақпараттық ресурстардың жұмысында жылдамдық, ашықтық алдыңғы орынға шықты. Бұл – әрине, бүгінгі қоғамға тән қалыпты ахуал. Дегенмен ақпараттың шынайылығы мен жауапкершілігі баршаға ортақ болуы тиіс», – деді өңір басшысы журналистерді құттықтау кезінде.
Сонымен қатар, ол журналистердің құқы мен жауапкершілігі, мемлекеттік органдармен сарабдал диалог жүргізу мәдениетін орнату, журналистиканың этикасы мен абырой кодексі, әділ сын, ақпарат кеңістігіндегі ақиқат пен дақпырт секілді ұғымдар бүгінгі таңда өзекті екенін атап өтті. Бейбіт Исабаев еліміздің ішкі тұрақтылығы, ақпараттық қауіпсіздігі мен идеологиялық дербестігіне, қоғамның бірлігіне медианың ықпалы мен жауапкершілігі жоғары екенін баса айтты.
«Әлеуметтік желідегі шындыққа жанаспайтын жел сөз бен өсек-аяңға тосқауыл қоя алатын да – кәсіби журналистиканың біліктілігі мен сарабдалдығы», – деді әкім.
Бейбіт Исабаев журналистер қауымына шығармашылық табыс тілеп, Жетісу өңірінің дамуына қосқан үлесі үшін тілшілерді марапаттады.
