Қазақстан аумағында мамыр айының басында барикалық құрылымдардың тез өзгеруіне байланысты ауа райы тұрақсыз сипатта болады. Найзағай ойнап, жаңбыр жауып, жел күшейеді. Ал елдің солтүстік, шығыс және оңтүстік-шығысындағы таулы аймақтарда түнгі уақытта жаңбыр мен қар аралас жауын-шашын күтіледі.
2 мамырда республиканың оңтүстік-шығысында және таулы өңірлерінде қатты жауын-шашын (жаңбыр, қар)болады деп болжануда. Тек Қазақстанның оңтүстігінде ауа райы жауын-шашынсыз өтеді.
Кей өңірлерде күндіз бұршақ жаууы мүмкін – әсіресе солтүстік-батыс, солтүстік, орталық және оңтүстік-шығыс аймақтарда. Сонымен қатар, батыс пен оңтүстікте шаңды дауылдар тұрып, республика бойынша түнгі және таңғы уақытта тұман түсуі ықтимал.
Синоптиктердің болжамынша, ауа температурасы айтарлықтай өзгермейді, бірақ күрт құбылып, жауын-шашын мен жел ауа райын салқын әрі ылғалды етеді.
