Дүниежүзілік денсаулық сақтау ұйымының мәліметінше, қазір 75 елде аталған ауруға 16 мыңнан астам адам шалдығып, 5 адам көз жұмған.
«Біз аз зерттеген бұл дерт бүкіл әлемге тез тарап кетті. Сондықтан маймыл шешегі жаһандық қоғамдық денсаулық сақтаудағы төтенше жағдай деп есептеймін», – деді ұйым басшысы Тедрос Гебрейесус.
Қазір ДДСҰ індетті жаһандық денсаулыққа қауіп ретінде қарастырады, сондықтан вирустың одан әрі таралуын және ықтимал пандемияның алдын алу үшін келісілген халықаралық әрекет қажет.
Қауіптің бұл деңгейі елдердің үкіметтеріне міндетті талаптар қоймайды, бірақ шұғыл әрекетке шақырады. Дүниежүзілік денсаулық сақтау ұйымы өзіне мүше мемлекеттерге тек нұсқаулар мен кеңес бере алады және жаһандық денсаулыққа қауіп төндіретін жағдайлар туралы хабарлауға міндетті.
ДДСҰ бағалауы бойынша, маймыл шешегінің таралу қаупі жаһандық деңгейде орташа. Ал Еуропа жерінде қауіп жоғары болып отыр.
