Министрлік мәліметінше, кейбір өнімдер арзандаған. Атап айтқанда, 27 мамырдағы дерек бойынша бір апта ішінде қырыққабаттың бағасы 3,4%-ға, жұмыртқа – 0,7%-ға, қарақұмық, макарон және күнбағыс майы – 0,1-0,2%-ға төмендеген. Нан мен күріштің бағасы өзгеріссіз қалған.
Сонымен қатар, бірқатар тауарлардың бағасы өскені байқалды. Бір аптада сәбіз – 4,2%-ға, картоп – 2,8%-ға, пияз – 2,5%-ға, тұз – 1,6%-ға, сүзбе – 0,8%-ға, сүт пен қант – 0,3%-ға, май, сиыр еті және тауық еті – 0,2%-ға, ал ұн мен айран – 0,1%-ға қымбаттаған.
Жалпы, 2025 жылдың басынан бері әлеуметтік маңызы бар азық-түлік бағасының индексі 6,8%-ға өскен.
Бағаны тұрақтандыру және азық-түлік қауіпсіздігін қамтамасыз ету мақсатында жедел шаралар қолға алынды. Атап айтқанда, Қытай, Пәкістан және Өзбекстаннан ерте пісетін көкөністер жеткізу жолға қойылды. Қазіргі таңда Астанада министрліктің қолдауымен «ҚТЖ Экспресс» АҚ жеткізген 50 рефрижератор контейнер картоп түсіріліп жатыр. Бұдан бөлек, ішкі нарықты толықтыру үшін қосымша 45 мың тонна картоп пен 4 мың тонна қырыққабат импортталған.
