Синоптиктердің болжауынша, 25–27 наурыз аралығында Абай және Шығыс Қазақстан облыстарында қардың тез еруі жалғасады. Соның салдарынан еріген қар суы көбейіп, өзендердегі су деңгейі көтерілуі мүмкін. Сонымен қатар, өзендерде мұз кептелістері пайда болып, бұл жағдай су тасуына себеп болуы ықтимал.
25–26 наурыз күндері Түркістан облысының таулы және тауға жақын аудандарында қатты жаңбыр жаууы болжанып отыр. Нәтижесінде жер үсті ағыны ұлғайып, өзен арналарындағы су деңгейі көтерілуі ықтимал. Қауіпті шек асқан жағдайда елді мекендер мен ауыл шаруашылығы нысандары, сондай-ақ жергілікті жолдарды су басу қаупі бар.
Сол сияқты 25–27 наурыз аралығында Жетісу облысының тау бөктеріндегі аумақтарында да нөсер жауын салдарынан өзендердің тасу қаупі туындауы мүмкін. Бұл өңірлерде де инфрақұрылым нысандарына және тұрғын үйлерге су басу қаупі төніп тұр.
Аталған өңірлердің барлығында дауылды ескерту жарияланды. Төтенше жағдайлар қызметі халыққа сақтық шараларын сақтап, қауіпсіздікке баса назар аударуға кеңес береді.
