«Шымкент қаласы бойынша сыбайлас жемқорлыққа қарсы қызмет қалалық мәдениет, тілдерді дамыту, архивтер басқармасының басшылығына және «Аrtsport» платформасы арқылы балалар шығармашылығын дамытуға бөлінген қаражатты ұрлауды ұйымдастырған басқа да лауазымды мамандарға қатысты тергеу жүргізіп жатыр», – деп хабарлады Антикордың баспасөз қызметі.
Антикор мәліметінше, спорттық мемлекеттік тапсырыс аясында 2022 жылы Шымкент қаласына 2,3 миллиард теңге бөлінген.
«Департамент тергеуінде 10 миллион теңге шамасында «Аrtsport» ақпараттық жүйесі арқылы балалар үйірмелерге қатысқандығы туралы жалған мәліметтерді пайдаланған ұрлықтың екі дерегі бар», – деп хабарлады Антикордың баспасөз қызметі.
Бюджет қаражатын иемдену бойынша ұқсас фактілері қосымша тексеріліп жатыр. Соттың санкциялауына байланысты, басқарма басшысы қамауға алынды.
Еске салайық, бұған дейін Мемлекет басшысы Қасым-Жомарт Тоқаев «Аrtsport » жобасының жүзеге асырылуын сынға алған болатын.
