«Таяу Шығыстағы жағдайдың күрделенуіне байланысты Сыртқы істер министрлігі Қазақстан азаматтарына осы аймаққа жоспарланған сапарларын қайта қарауды және олардан бас тартуды ұсынады», – делінген ведомствоның ресми мәлімдемесінде.
Министрліктің мәліметінше, қазіргі уақытта аймақтағы жағдай мен ықтимал қауіп-қатерлер жан-жақты сарапталуда. Қазақстанның тиісті мемлекеттік органдары мен шетелдік әріптестерімен үйлестірілген шаралар қолға алынған.
Ұшу шектеулері мен қауіпсіздік қатері
Таяу Шығыс елдерінде бірнеше мемлекет әуе кеңістігін уақытша шектеуге мәжбүр болды. Соның салдарынан халықаралық рейстер тоқтатылып, кейбір бағыттар кейінге шегерілді.
Шетелдегі қазақстандықтарға арналған СІМ кеңестері
Сыртқы істер министрлігі қазіргі уақытта Таяу Шығыста, әсіресе Қатар мен Біріккен Араб Әмірліктерінде жүрген қазақстандықтарға төмендегідей кеңес береді:
Сабыр сақтау және жергілікті билік белгілеген қауіпсіздік талаптарын қатаң орындау.
Бұқаралық іс-шараларға қатыспау және әскери нысандарға жақындамау.
Ресми органдар мен Қазақстанның шет елдердегі мекемелері таратқан ақпаратты мұқият бақылау.
Әуе рейстерінің мәртебесін және эвакуация жолдарын үнемі нақтылап отыру.
Төменде көрсетілген шұғыл байланыс арналары арқылы Қазақстан елшіліктерімен тікелей байланыста болу.
Шұғыл байланыс нөмірлері
Қазақстанның Қатардағы елшілігі:
+97450649955
+97470910579
Электронды пошта: kazconsul.doha@gmail.com, doha@mfa.kz
Қазақстанның БАӘ-дегі (Әбу-Даби) елшілігі:
+97124498778
+971503629805
Электронды пошта: abudhabi@mfa.kz
Қазақстанның Дубай қаласындағы Бас консулдығы:
+971556103341
+971505701978
Электронды пошта: dubai@mfa.kz
Қазақстан Республикасының Сыртқы істер министрлігі:
+7 (7172) 72 05 00
Қазақстанның дипломатиялық өкілдіктері қалыпты режимде жұмыс істеп жатыр
Сыртқы істер министрлігі Таяу Шығыс елдеріндегі Қазақстанның барлық дипломатиялық өкілдіктері қалыпты режимде жұмыс істеп жатқанын, жағдайды жіті бақылауда ұстап отырғанын және Қазақстан азаматтарына тәулік бойы консулдық-құқықтық көмек көрсетуін жалғастырып жатқанын хабарлады.
