Қонаев қаласынан бастау алған турникке тартылудан республикалық жарыс, Талдықорған қаласында өз жалғасын тапты.
«Мақсатымыз еліміздегі көптеген дарынды, талантты жастарға, көпір болу. Тек елде ғана ұйымдастырып қоймай, әлемдік додаға қосу. Бұл тек қана турник емес, басқа да жарыстарды насихаттау, турнир — алғашқы әрекет, алғашқы бастама деп айтуға болады», – деді қордың жетекшісі Нұрлан Қоянбаев.
«Кермеге тартылу жастардың көпшілігі қызығатын спорт. Жарыстың талаптары өте қарапайым. Сондықтан жиі ұйымдастырып, атлеттердің шеберлігін шыңдауымыз керек. Олардың арасындағы үздіктерін тауып, ел құрамасына қоссақ дейміз», – деді бас төреші Айтым Жақыпов.
Жарысқа 288 спортшы қатысты. Салмақ дәрежесі бойынша 3 топқа бөлінген. Сайыскерлердің ішінде қол күрестен Әлем және Азия чемпионы Әбдуәли Тастанов та бар.
«Бала күнімде осы турникпен өскем. Ол кезде 57 келі едік, турникке 100-ден асыра тартылатынмын. Қазір салмағым 90 кг. Қазақтың өсіп келе жатқан балаларына өте керемет іс-шара. Сол жастарға салауатты өмір салтын насихаттап, спортты серік етуге үлгі болайын деп келіп тұрмын», – деді Армрестлингтан халықаралық дәрежедегі спорт шебері Әбдуәли Тастанов.
Жарысқа Жетісу облысынан кіл мықтылар жиналды. Әсіресе Көксу ауданынынан көп спортшы келді. Ішінде кермеге тартылудан түрлі жарыстардың жеңімпаздары да бар. Солардың бірі — Игілік Дәрімбаев.
«27 жылдай болды, турникке тартылып, брусиямен айналысып жүргенімізге. Аяқ-қолды, денені дұрыс ұстау керек. Турникке тартылу үшін салмақтың жеңіл болғаны жөн», – дейді Игілік Дәрімбаев.
