Оның айтуынша, биыл құрылыстың қыр-сырын зеттеу жұмыстары жүргізіліп, одан кейін нақты жұмыс жоспары белгілі болады. Сонымен қатар, келесі жылы керек технологияларды анықтап, есептеулер жүргізіледі.
Министр құрылыс аймағының геологиялық параметрлері, су ресурстары, климаттық жағдайы, ұлттық электр желілеріне дейінгі қашықтығынан таңдалғанын түсіндірді.
«Құрылыс барысында әртүрлі технологиялар, атап айтқанда, әлемдегі ең үздіктердің қатарына кіретін француз және ресейлік реакторлар зерттеледі», – дейді Б.Ақшолақов
Энергетика министрлігінің басшысы жобаның нақты сметасын нақтылаған жоқ.
«Бұл әлі белгісіз. Алдымен технологияны таңдау керек. Біз әлі де реактордың өзі туралы айтып отырмыз – бұл стансының жүрегі. Оған турбиналар керек, жүйелік, автоматтандыру болуы керек. Стансының жұмыс істеуі үшін неше түрлі құрылғыларды орнату керек», – деді ол.
Айта кетейік, бұған дейін Президент Қасым-Жомарт Тоқаев Қазақстан атом электр стансысы қайда салынатыны бойынша шешім шығарғанын және ықтимал жеткізушілердің технологияларын зерттеп жатқанын айтқан еді.
Айжан ОРАЛБЕКОВА
