Тұрғын үй инспекциясы бөлімінің басшысы, полиция департаментінің қызметкерлері және Талдықорған қаласы әкімінің баспасөз хатшысы бірлесіп коммуналдық тұрғын үйлерге тексеріс жүргізген. Әкімдіктің хабарлауынша, шілде айына дейін анықталған заң бұзушылықтарға байланысты 14 пәтер мемлекетке қайтарылған. Алдағы уақытта бұл пәтерлер Қазақстан Республикасының заңнамасы аясында кезекте тұрған адамдарға үлестірілмек.
«16 шілде күні Жетісу облысы прокурорының орынбасары және Талдықорған қаласының прокуроры тұратын үйлер тексерілді. Айта кетейік, бұл пәтерлер – қала әкімдігінің есебінде және жекешелендіруге жатпайтын қызметтік үйлер. Лауазымды қызмет уақыты аяқталған соң, пәтерлер жаңадан тағайындалған прокуратура қызметкерлеріне қайта бөлінеді. Сондай-ақ, тұрғындарға ҚР «Тұрғын үй қатынастары туралы» Заңы бұзылғаны туралы хабарлама берілді», – делінген әкімдік ақпаратында.
Осы орайда, тексеріс науқаны әлі де жалғасатынын және барлық іс тиісті органдардың бақылауында болатынын айта кеткеніміз жөн.
