Мира Садықова көпбалалы ана. Қазір алтыншысына аяғы ауыр. Отбасымен екі бөлмелі пәтерде тұрады. Президенттің бала күтіміне берілетін әлеуметтік жәрдемінің тағы алты айға ұзартылғанын біледі. Мерзімімен бірге көлемі де артса деген үмітте.
«Бір жасқа дейін алатынбыз. Ұлғайтыпты. Ол балаға кәдімгідей көмек қой. Мемлекет тарапынан көпбалалы ана ретінде әр балаға он сегіз жасқа дейін пасобия аламын», – деді қала тұрғыны Мира Садықова.
Облыстық жұмыспен қамту басқармасының мәліметінше өңірде 44 мыңнан астам ана бала күтіміне берілетін мемлекеттік жәрдемақы алады.
«Жәрдемақы төлеу мерзімі ұзарып отыр және бұрын мұндай кезде адам жұмысқа шығып кетсе бір жылдан кейін жәрдемақысы тоқтатылатын. 23 жылдың бірінші қаңтарынан бастап жұмыс істесе де, істмесе де бала күтіміне қатысты ақы алып отырады», – дейді облыстық жұмыспен қамту және әлеуметтік бағдарламалар басқармасының басшысы Айгүл Ахметова.
Айта кету керек, жыл басынан бері Алматы облысында жиырма мың нәресте дүниеге келген. Бұл республика бойынша жоғарғы көрсеткіш саналады.