Кездесу барысында ол жұртшылықтың көкейкесті сұрақтарына жауап берді.
«Панфилов ауылында Алматыға қатынайтын қоғамдық көлік жоқ. Жергілікті әкімдік өкілдері автобустардың бөлінетіндігі туралы тамыз айында уәде еткен. Алайда, бұл мәселе әлі өз шешімін таппады», – деді облыс әкіміне сұрақ қойған азамат.
Ал Марат Сұлтанғазиевтің айтуынша, облыста қоғамдық көлік проблемасын шешу мақсатында коммуналдық кәсіпорын құрылды.
«Атамекен» Ұлттық кәсіпкерлер палатасымен де келіссөздер жүргіздік. Себебі, облыста автобус паркі жоқ. Қазіргі таңда коммуналдық кәсіпорын үшін Алматы қаласының балансынан шыққан 300 автобусты алдық. Өткен жолы Талғар ауданында балалар тасымалымен айналысатын көлік бөлгіміз келгенде, олардың талаптарға сай келмейтіні анықталды. Бүгінде 20 автобус жөндеуден шықты», – деді облыс әкімі.
Аталған автобустар кезек-кезек жөндеуден өткізіліп, барлық аудандарға қолданысқа беріледі.
«Проблеманың бар екенінен хабардармыз. Ендігі жылы аудандарда қоғамдық көлік жүргізу үшін субсидия бөлінеді», – деді Марат Сұлтанғазиев.
