Талдықорған қаласының тұрғындары әкім Әсет Масабаевқа қала көлігінің саяжай алаптарына қатынауының қолайсыздығына шағымданды, деп хабарлады әкімнің баспасөз қызметі.
Атап айтқанда, 227-4 және 227-8 бағыттарының интервалына қатысты шағымдар түскен. Азаматтардың айтуынша, бұл бағытта автобустар өте аз жүреді. Тұрғындарды тыңдап болған соң, әкім қоғамдық көліктің сапасын тексеруге шыққан. Қала басшысы ыңғайлы киім киіп, аталған бағыттар бойынша саяжай тұрғындарымен бірге жүріп өтіпті.
«Бұл суретте Талдықорған қаласының әкімі Әсет Масабаев бейнеленген. Еңбек ауылының, «Жастар-2» және «Ынтымақ» алаптарының тұрғындарымен кездесуден кейін әкімге қоғамдық көлік туралы көптеген шағымдар келіп түсті. Осыдан кейін қала әкімі ешкімге ескертпей аталған бағыттарды аралап шықты», – деді Талдықорған қаласы әкімінің баспасөз хатшысы Мәди Шәкенов.
Айта кетейік, қоғамдық көлікте отырған әкімнің суреті әлеуметтік желіде тарап кеткен болатын. Қала тұрғындары фотодағы ер адам әкімге ұқсайтындығын айтты. Баспасөз хатшысы Мәди Шакеновтың айтуынша, Әсет Масабаев қоғамдық көлікпен тасымалдау сапасын тексеру мақсатында мұндай құпия рейдтерге жиі шығатын көрінеді.
