«Алматы облысының Сыбайлас жемқорлыққа қарсы іс-қимыл департаментінің ұсынысы бойынша білім бөлімінің бұрынғы басшысы Майгүл Тлеутайқызы Омарова лауазымынан босатылды. 2021 жылдың ақпан айынан бастап басқарма басшысыз қалды. Бұл жұмыс сапасына әсер етеді», — делінген әкімдіктің хабарламасында.
Сонымен қатар, хабарламада облыстағы 3 ауысымды мектептер, білім ордаларын сапасыз жөндеу мен құрылыс фактілері, мұғалімдерді мерзімді басылымдарға күштеп жазғызу, директорлардың ақша жинатуы, білім сапасының төмендігі мәселелеріне байланысты қызметтік тергеу жүргізілетіндігі жайлы жазылған.
Әкімдіктің мәліметінше, биылғы жылдың 15 шілдесінде негізгі талаптарды көрсете отырып, Алматы облысы Білім басқармасы басшысының лауазымына ішкі конкурс жарияланған. Кандидаттардың құжаттары 18-20 шілде аралығында жұмыс уақытында қабылданады.
«Бұдан әрі Алматы облысы әкімі аппаратының «адам ресурстарын басқару және мемлекеттік қызметтерді мониторингтеу» бөлімі кандидаттардың құжаттарын қарайды. Құжаттарды қабылдау мерзімі аяқталғаннан кейін бір жұмыс күні ішінде қатысушыларды сұхбаттасуға жіберу туралы шешім қабылдайды. Сұхбат — қоғамдық ұйым өкілдерінің және БАҚ-тың қатысуымен өтеді. Сұхбаттасуға жіберілген кандидаттардың тізімі сұхбат өткізуге бір күн қалғанда Алматы облысы әкімдігінің ресми сайтында жарияланады. Бұдан бөлек, сұхбаттасу өткенге дейін кандидаттар Қазақстан Республикасы Білім және ғылым министрлігімен келісіледі», — деп әкімдік хабарламасында конкурс жайлы ақпарат көрсетілген.
Ал, Еңбекшіқазақ ауданы әкімін тағайындауға қатысты жарияланған жалған ақпарат жайында облыс әкімдігі: «ҚР Президентінің «Мемлекеттік билік органдары жүйесіндегі кадр саясатының кейбір мәселелері туралы» Жарлығына сәйкес аудан әкімдерін ҚР Президенті Әкімшілігінің басшысымен және аудандық мәслихат депутаттарының келісімі бойынша облыс әкімі тағайындайды», — деп мәлім етті.
Алматы облысының кадрлық ауыс-түйісі халықтың назарынан тыс қалмайды. Алдағы уақытта осы бағыттағы жаңалықтар сайтымызда үздіксіз жарияланатын болады.
