Ресми мәліметтерге сәйкес, тілсіз жау 73,2 шаршы шақырым орманды алқапты алып кеткен. Сейсенбіде жалынның 26% ауыздықталған. Тілсіз жаумен күресуге 3 мың өрт сөндіруші мен авиация жұмылдырылған.
Өрт нәтижесінде 41 ғимарат өртеніп кетті. Ал 1440 ғимарат әлі де қауіп аймағында тұр. Йосемити ұлттық паркіне жақын жердегі Уошберн қаласы маңында да өрт шығып, 9,7 шаршы шақырым орман отқа оранған. Орманның 87% жеріндегі өртті сөндіруге үш апта кетті. Құтқарушылар өрт сөндіру кезінде парктегі ең көне әрі алып ағаштарды сақтап қалуға тырысып жатыр.
Өрт салдарынан жергілікті мыңдаған тұрғын эвакуациялануға мәжбүр болды. Калифорния губернаторы Гэвин Ньюсом өрттің тез таралуына байланысты Марипоса округінде төтенше жағдай жариялады. Биыл Калифорния штатында өрт жалпы көлемі 214,5 шаршы шақырым орманды жойып жіберген. Оған қуаңшылық пен күннің қатты ысуы себеп болып отыр.
