Ауруханаға соңғы үш күнде коронавирус жұқтырған 7 науқас түскен. Мамандардың айтуынша, қазіргі уақытта аудандарда ковидтік госпитальдар жабылғандықтан, барлық науқастар облыстық жұқпалы аурулар ауруханасына жіберіледі.
Медициналық мекемеде ем алып жатқан 11 науқастың ішінде Қаратал, Сарқан, Ескелді аудандары мен Текелі қаласының тұрғындары бар. Бұл туралы облыстық жұқпалы аурулар ауруханасының директоры Біржан Оспанов біздің агенттіктің тілшісіне баяндады. Ол дәрігерлердің коронавирус жұқтырған науқастар ағынына толық дайын екенін атап өтті.
«Кез келген уақытта біз 200 кереует пен жансақтау бөлімінен 20 орын бөле аламыз. Қажетті дәрілер, медициналық құрылғылар жеткілікті», — деді Біржан Оспанов.
Ал Алматы облысының орталығы Қонаев қаласында коронавирус инфекциясын жұқтырған 1 адам да тіркелмеген. Десе де, аурудың жылдам таралу қаупі жоқ емес. Бұл жайында Қонаев қалалық ауруханасының эпидемиолог дәрігері Ерлан Жарылқапұлы мәлім етті.
Оның айтуынша, ауруханада 30 орын инфекция бөліміне бөлінген. COVID-19 белгісі бар ЖИТС-тің ауыр түрімен, пневмониямен ауыратын адамдарға мониторинг жасалып, бақылау күшейтілген.
«Сонымен қатар, біздің аурухана ауласында оттегі станциясы жұмыс жасап тұр. Аурухананың ішінде одан оттегі алатын 210 нүкте бар. Бұл бірегей құрылғы науқастардың хал-жағдайының қаншалықты жақсы я нашар екенін бірден көрсетеді», — дейді дәрігер.
Эпидемиологтардың хабарлауынша, Алматы мен Жетісу облыстарында жүзден астам адам коронавирус жұқтырған.
