«Жетісу зиялылары ғаламтордың күші мен мүмкіндіктерін ескерусіз, бей-жай қалдырмауы тиіс. Сондықтан, ғаламтордағы белгілі платформалар мен әлеуметтік желідегі чаттар мен топтардың жұмысына белсенді қатысуы тиіс, өйткені мұнда өскелең ұрпақтың физикалық, психикалық денсаулығы мен ақыл-ойына ықпал ететін ақпараттар тұнып тұр. Бұл еліміздің болашағына қауіпті», — деді Бейбіт Исабаев.
Өңір басшысының пайымдауынша, виртуалды қоғам тұлғаның қалыптасуына тікелей әсер етеді –ондағы жасанды мінез-құлық үлгілері қоғамның құндылықтары мен қарым-қатынас нормаларына кері ықпал жасайды. Интернеттегі қарым-қатынас сөзсіз пайдалы болғанмен, жастардың тұрақсыз психикасына зиян келтіріп жатқанын атап өтті.
«Бүгінгі қоғамда әлеуметтік масылдық үрдісі, алақан жаю белең алуда. Жалқаулық, жатыпішерлік тектес жаман әдеттер қалыптасты. Одан арылу үшін біз қарапайым еңбек адамын дәріптеп, еңбекті ең үлкен құндылық ретінде қалыптастыруға тиіспіз», — деді Бейбіт Исабаев зиялы қауым өкілдеріне.
Зиялы қауым өкілдері өңірдің күн тәртібіндегі тіл, дін сияқты рухани проблемалар әлі де маңызды тақырыптар екенін айтты. Сондай-ақ облыс аумағында экономикалық, саяси және әлеуметтік саланы дамыту үшін бірқатар ұсыныстар жасалды. Мәселен, ауыл жастарын қолдау, ата-ана қамқорлығынсыз қалған балалар баспанасы, медицина, мәдениет, ауыл мен аудан тұрғындарының мәселесі, отбасын сақтап қалатын дағдарыс орталығын ашу, ассамблеядағы татулыққа облыс әкімінің назарын аударды. Бейбіт Исабаев өз кезегінде халықтың бұйымтайын жеткізген зиялы қауым өкілдеріне ризашылығын білдіріп, ұсыныстар ескерусіз қалмайтынын айтты.
