Соңғы бес айында инвестиция көлемі 17 млрд теңгеден асты, деп хабарлады қала әкімі Әсет Масабаев сейсенбі күні БАҚ өкілдерімен өткен брифингте.«2022 жылдың қаңтар-мамыр айларында негізгі капиталға салынған инвестиция көлемі 17,2 млрд теңгені құрады, нақты көлем индексі – 134,6%. Инвестициялардың 7,4 млрд теңгесі меншікті қаражат – 43,0% – ды құрайды», – деді Әсет Масабаев.
Осы жылдың тамыз айында газ блоктарын шығаратын «BARS TECHNOLOGIES» ЖШС зауыт іске қосылады. Инвестиция көлемі – 800 млн теңге, 80 жұмыс орны ашылады.
1,5 млрд теңге инвестиция «Алмаз керамикс» ЖШС керамикалық плиталар өндіру зауытын кеңейтуге бағытталған, 150 жаңа жұмыс орны ашылады. Іске қосу қыркүйек айына жоспарланған.
Қазан айында 120 жұмыс орнына арналған «ASMA Industrial» ЖШС стационарлық аккумуляторлар шығаратын зауыт іске қосылады. Инвестиция құны – 3,2 млрд теңге.
Әкім ағымдағы жылдың маусым айында 300-ге дейін кеңейту жоспарымен 100 жұмыс орнына арналған «Айсұлу» тігін фабрикасы іске қосылғанын еске салды.
Әсет Масабаевтың мәліметінше, 2023 жылы тағы 4 кәсіпорынды іске қосу жоспарланған. Олардың ішінде: «Amanat Logistic KZ» ЖШС астық қоймасы (инвестициялар-970 млн теңге, жұмыс орны-25); «Jetysu ceramic» ЖШС керамикалық плиталарды өндіру зауыты (инвестициялар – 5,5 млрд. теңге, жұмыс орны– 67); «ТК газоблок» ЖШС автоклавты газоблоктарын өндіру зауыты (инвестициялар – 6,2 млрд.теңге, жұмыс орны – 50); элеватор «Жетысу Экспорт» ЖШС (инвестициялар – 3,3 млрд. теңге, жұмыс орны-20).
